વોશિંગ્ટન, પ્રતિનિધિ: અમેરિકામાં આયાત જકાતને લઈને ચાલી રહેલી કાનૂની લડાઈ વચ્ચે ટ્રમ્પ પ્રશાસનને મહત્વપૂર્ણ રાહત મળી છે. વોશિંગ્ટનની એક ફેડરલ અપીલ કોર્ટે નિર્ણય આપ્યો છે કે યુએસ સરકાર કાનૂની પ્રક્રિયા પૂર્ણ ન થાય ત્યાં સુધી વિશ્વભરમાંથી આયાત થતી ચીજવસ્તુઓ પર લાગુ 10% ટેરિફ વસૂલવાનું ચાલુ રાખી શકે છે.
આ ચુકાદા બાદ રાષ્ટ્રપતિ ડોનાલ્ડ ટ્રમ્પની વેપાર નીતિને તાત્કાલિક આધાર મળ્યો છે. ટ્રમ્પ પ્રશાસનનું કહેવું છે કે આ ટેરિફ અમેરિકન ઉદ્યોગોને સુરક્ષા આપવા અને વેપાર ખાધ ઘટાડવા માટે જરૂરી છે.
કોર્ટનો આદેશ અંતિમ ચુકાદો નથી, પરંતુ મુખ્ય કેસનો નિકાલ ન થાય ત્યાં સુધી હાલની ટેરિફ વ્યવસ્થા યથાવત રહેશે. આયાતકારો અને કેટલાક ઉદ્યોગ જૂથોએ આ ટેરિફને પડકારતાં દલીલ કરી હતી કે વધારાની જકાતના કારણે વેપાર ખર્ચ વધી રહ્યો છે અને અમેરિકન ગ્રાહકો પર ભાર પડી રહ્યો છે.
આ નિર્ણયથી વૈશ્વિક વેપાર બજારોમાં પણ ચર્ચા તેજ બની છે, કારણ કે અમેરિકાના 10% ટેરિફનો પ્રભાવ અનેક દેશોના નિકાસકારો પર પડી શકે છે. વિશેષજ્ઞોનું માનવું છે કે અંતિમ કાનૂની નિર્ણય અમેરિકા અને તેના વેપારી ભાગીદારો વચ્ચેના વેપાર સંબંધો પર નોંધપાત્ર અસર કરી શકે છે.
